ਪੰਜਾਬ ਸਟੂਡੈਂਟਸ ਯੂਨੀਅਨ ਨੇ ਸਰਕਾਰੀ ਆਈ ਟੀ ਆਈ ਦੀਆਂ ਵਿਦਿਆਰਥੀ ਮੰਗਾਂ ਸਬੰਧੀ ਡਿਪਟੀ ਕਮਿਸ਼ਨਰ ਨੂੰ ਦਿੱਤਾ ਮੰਗ ਪੱਤਰ
ਫਰੀਦਕੋਟ 10 ਮਈ (ਪੰਜਾਬ ਡਾਇਰੀ)- ਪੰਜਾਬ ਸਟੂਡੈਂਟਸ ਯੂਨੀਅਨ ਵੱਲੋਂ ਸਰਕਾਰੀ ਆਈ ਟੀ ਆਈ ਦੀਆਂ ਵਿਦਿਆਰਥੀ ਮੰਗਾਂ ਉੱਪਰ ਡਿਪਟੀ ਕਮਿਸ਼ਨਰ ਨੂੰ ਮੰਗ ਪੱਤਰ ਸੌਂਪਿਆ ਗਿਆ। ਜਾਣਕਾਰੀ ਦਿੰਦਿਆਂ ਪੰਜਾਬ ਸਟੂਡੈਂਟਸ ਯੂਨੀਅਨ ਦੇ ਕਮੇਟੀ ਮੀਤ ਪ੍ਰਧਾਨ ਅਕਾਸ਼ਦੀਪ ਸਿੰਘ ਅਤੇ ਪਰਦੀਪ ਸਿੰਘ ਨੇ ਕਿਹਾ ਕਿ ਸੰਸਥਾ ਸਾਹਮਣੇ ਬੱਸਾਂ ਨਾ ਰੁਕਣ ਦੀ ਸਮੱਸਿਆ ਕਈ ਵਾਰ ਪ੍ਰਸ਼ਾਸ਼ਣ ਸਾਹਮਣੇ ਲਿਆਂਦੀ ਗਈ ਹੈ ਪਰ ਪ੍ਰਸ਼ਾਸ਼ਣ ਵਲੋਂ ਗੇਟ ਅੱਗੇ ਬੱਸ ਸਟਾਪ ਨਹੀਂ ਬਣਵਾਇਆ ਗਿਆ। ਗੇਟ ਕੋਲੋਂ ਖੁੱਲਾ ਗੰਦਾ ਨਾਲਾ ਵਗਦਾ ਹੈ ਜਿਸ ਕਾਰਨ ਮੱਖੀਆਂ ਮੱਛਰ ਪੈਦਾ ਹੁੰਦੇ ਹਨ, ਨਾ ਹੀ ਸੰਸਥਾ ਦੀ ਸਫ਼ਾਈ ਹੁੰਦੀ ਹੈ ,ਗੇਟ ਦੀ ਹਾਲਾਤ ਵੀ ਬਹੁਤ ਖ਼ਰਾਬ ਹੈ । ਪ੍ਰੋਫ਼ੈਸਰਾਂ ਅਤੇ ਸੁਰੱਖਿਆ ਕਰਮੀਆਂ ਦੀਆਂ ਆਸਾਮੀਆਂ ਵੀ ਖ਼ਾਲੀ ਪਾਈਆਂ ਹਨ । ਸੰਸਥਾ ਵਿੱਚ ਨਵੀਂ ਤਕਨੀਕ ਦੀ ਮਸ਼ਨਿਰੀ ਦੀ ਵੀ ਲੋੜ ਹੈ । ਇਹਨਾਂ ਮੰਗਾਂ ਦੇ ਨਾਲ਼ ਨਾਲ਼ ਡੂਅਲ ਸਿਸਟਮ ਰੱਦ ਕਰਾਉਣ ਦੀ ਵੀ ਮੰਗ ਕੀਤੀ ਗਈ , ਜਿਸ ਅਨੁਸਾਰ ਵਿਦਿਆਰਥੀਆਂ ਤੋਂ ਟ੍ਰੇਨਿੰਗ ਦੇ ਨਾਮ ਉੱਪਰ ਫੈਕਟਰੀਆਂ ਵਿੱਚ ਮੁਫ਼ਤ ਕੰਮ ਕਰਵਾਇਆ ਜਾਵੇਗਾ । ਯੂਨੀਅਨ ਦੇ ਜ਼ਿਲ੍ਹਾ ਸਕੱਤਰ ਹਰਵੀਰ ਅਤੇ ਸੁਖਬੀਰ ਸਿੰਘ ਨੇ ਕਿਹਾ ਕਿ ਅਗਰ ਇਹਨਾਂ ਮੰਗਾਂ ਨੂੰ ਨਾ ਮੰਨਿਆ ਗਿਆ ਤਾਂ ਪੰਜਾਬ ਸਟੂਡੈਂਟਸ ਯੂਨੀਅਨ ਇਸ ਤੇ ਤਿੱਖਾ ਸੰਗਰਸ਼ ਕਰੇਗੀ ।
