ਰਾਮ ਰਹੀਮ ਦੀ ਪੈਰੋਲ ‘ਤੇ ਹੋ ਰਹੀ ਅਲੋਚਨਾ ਮਗਰੋਂ ਬੋਲੇ CM ਖੱਟਰ- ‘ਇਹ ਹਰ ਕੈਦੀ ਦਾ ਹੱਕ’
ਹਰਿਆਣਾ, 22 ਜੁਲਾਈ (ਡੇਲੀ ਪੋਸਟ ਪੰਜਾਬੀ)- ਹਰਿਆਣਾ ਦੇ ਮੁੱਖ ਮੰਤਰੀ ਮਨੋਹਰ ਲਾਲ ਦਾ ਡੇਰਾ ਸੱਚਾ ਸੌਦਾ ਸਿਰਸਾ ਦੇ ਮੁਖੀ ਰਾਮ ਰਹੀਮ ਨੂੰ 7ਵੀਂ ਵਾਰ ਪੈਰੋਲ ‘ਤੇ ਮਿਲਣ ‘ਤੇ ਵੱਡਾ ਬਿਆਨ ਸਾਹਮਣੇ ਆਇਆ ਹੈ। ਉਨ੍ਹਾਂ ਕਿਹਾ ਕਿ ਹਰ ਕੈਦੀ ਦਾ ਅਧਿਕਾਰ ਹੈ, ਇਸੇ ਲਈ ਰਾਮ ਰਹੀਮ ਨੂੰ ਪੈਰੋਲ ਮਿਲੀ ਹੈ। ਇੰਨਾ ਜ਼ਰੂਰ ਹੈ ਕਿ ਅਸੀਂ ਉਨ੍ਹਾਂ ਨੂੰ ਸਿਰਸਾ ਸਥਿਤ ਆਸ਼ਰਮ ਵਿਚ ਆਉਣ ਦੀ ਇਜਾਜ਼ਤ ਨਹੀਂ ਦਿੰਦੇ। ਸੀਐਮ ਦਾ ਇਹ ਬਿਆਨ ਰਾਮ ਰਹੀਮ ਨੂੰ ਲਗਾਤਾਰ ਪੈਰੋਲ ‘ਤੇ ਮਿਲਣ ‘ਤੇ ਹਰਿਆਣਾ ਸਰਕਾਰ ਦੀ ਆਲੋਚਨਾ ਤੋਂ ਬਾਅਦ ਆਇਆ ਹੈ।
ਸੀ.ਐੱਮ. ਮਨੋਹਰ ਲਾਲ ਨੇ ਕਿਹਾ ਕਿ ਰਾਮ ਰਹੀਮ ਇੱਕ ਅਪਰਾਧੀ ਹੈ। ਉਸ ਨੇ ਜੁਰਮ ਕੀਤਾ ਹੈ। ਉਸ ਨੂੰ ਸਜ਼ਾ ਮਿਲੀ। ਜਦੋਂ ਉਸ ਨੂੰ ਸਜ਼ਾ ਮਿਲ ਰਹੀ ਸੀ ਤਾਂ ਸਰਕਾਰ ਨੇ ਕਦੇ ਘੱਟ ਕਰਨ ਲਈ ਨਹੀਂ ਕਿਹਾ। ਅਸੀਂ ਕਦੇ ਸਮਰਥਨ ਨਹੀਂ ਕੀਤਾ ਇਹ ਅਦਾਲਤੀ ਮਾਮਲਾ ਹੈ, ਅਦਾਲਤ ਕਰੇਗੀ। ਅਦਾਲਤ ਨੂੰ ਸੌਂਪ ਦਿੱਤਾ। ਅਦਾਲਤ ਨੇ ਸਜ਼ਾ ਦਿੱਤੀ। ਉਨ੍ਹਾਂ ਨੂੰ ਜੇਲ੍ਹ ਭੇਜ ਦਿੱਤਾ।
ਉਨ੍ਹਾਂ ਕਿਹਾ ਕਿ ਅਪਰਾਧੀਆਂ ਅਤੇ ਕੈਦੀਆਂ ਨੂੰ ਵੀ ਕੁਝ ਅਧਿਕਾਰ ਮਿਲੇ ਹਨ। ਅਸੀਂ ਉਨ੍ਹਾਂ ਨੂੰ ਨਹੀਂ ਦਿੱਤੇ, ਇਹ ਪਹਿਲਾਂ ਹੀ ਮੌਜੂਦ ਹਨ। ਇੱਕ ਅਪਰਾਧੀ ਨੂੰ ਕੀ ਮਿਲ ਸਕਦਾ ਹੈ ਕਿ ਕੀ ਨਹੀਂ, ਇਹ ਮੈਨੁਅਲ ਵਿੱਚ ਲਿਖਿਆ ਹੋਇਆ ਹੈ। ਇਸ ਮੈਨੁਅਲ ਦੇ ਹਿਸਾਬ ਨਾਲ ਸਜ਼ਾ ਦੇ ਸ਼ੁਰੂ ਦੇ 2 ਸਾਲਾਂ ਵਿੱਚ ਉਨ੍ਹਾਂ ਨੂੰ ਕੋਈ ਪੈਰੋਲ ਨਹੀਂ ਮਿਲੀ। ਬਾਅਦ ਵਿੱਚ ਉਨ੍ਹਾਂ ਨੂੰ ਪੈਰੋਲ ਮਿਲਣੀ ਸੀ ਤਾਂ ਮਿਲ ਗਈ। ਇਹ ਪ੍ਰਸ਼ਾਸਨਿਕ ਕੰਮ ਹੈ। ਜੇਲ੍ਹ ਵਾਲਿਆਂ ਨੇ ਕੀਤਾ।
ਸੀ.ਐੱਮ. ਖੱਟਰ ਨੇ ਕਿਹਾ ਕਿ ਸਾਡੀ ਕੋਈ ਨਿੱਜੀ ਰੰਜਿਸ਼ ਨਹੀਂ ਹੈ। ਉਹ ਅਜੇ ਵੀ ਕਾਨੂੰਨ ਮੁਤਾਬਕ ਕੈਦੀ ਹਨ। ਕੈਦ ਵਿੱਚ ਰਹਿਣ ਤੋਂ ਬਾਅਦ ਉਹ ਆਪਣੇ ਅਧਿਕਾਰਾਂ ਦੀ ਵਰਤੋਂ ਕਰਨਗੇ। ਜਿਸ ਦਾ ਹੱਕ ਨਹੀਂ, ਉਹ ਨਹੀਂ ਮਿਲੇਗਾ। ਸਰਕਾਰ ਉਨ੍ਹਾਂ ਨੂੰ ਕੋਈ ਐਕਸਟ੍ਰਾ ਫੇਵਰ ਨਹੀਂ ਦੇ ਰਹੀ।
ਉਨ੍ਹਾਂ ਕਿਹਾ ਕਿ ਕਾਨੂੰਨ ਵਿਵਸਥਾ ਦੇ ਕਾਰਨ ਰਾਜ ਸਰਕਾਰ ਨੂੰ ਪੁੱਛਿਆ ਜਾਂਦਾ ਹੈ ਕਿ ਜੇ ਉਨ੍ਹਾਂ ਨੂੰ ਪੈਰੋਲ ਮਿਲ ਜਾਵੇ ਤਾਂ ਉਨ੍ਹਾਂ ਨੂੰ ਕਿੱਥੇ ਰੱਖਣਾ ਹੈ? ਸਾਡੀਆਂ ਏਜੰਸੀਆਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸਿਰਸਾ ਵਿੱਚ ਨਹੀਂ ਰੱਖਿਆ ਜਾਣਾ ਚਾਹੀਦਾ। ਉਹ ਹਮੇਸ਼ਾ ਸਿਰਸਾ ਲਈ ਅਪਲਾਈ ਕਰਦੇ ਰਹੇ ਹਨ ਪਰ ਅਸੀਂ ਉਸ ਦਾ ਜ਼ਿਕਰ ਨਹੀਂ ਕਰਦੇ। ਸਾਨੂੰ ਬਾਕੀ ਆਸ਼ਰਮਾਂ ‘ਤੇ ਕੋਈ ਇਤਰਾਜ਼ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਜੇ ਉਹ ਉੱਤਰ ਪ੍ਰਦੇਸ਼ ਵਿੱਚ ਰਹਿਣਾ ਚਾਹੁੰਦੇ ਸਨ ਤਾਂ ਉਥੋਂ ਦੇ ਪ੍ਰਸ਼ਾਸਨ ਤੋਂ ਰਿਪੋਰਟ ਲੈ ਲਈ ਗਈ ਸੀ। ਉਨ੍ਹਾਂ ਕਿਹਾ ਕਿ ਜੇ ਕੋਈ ਸਮੱਸਿਆ ਨਹੀਂ ਹੈ ਤਾਂ ਉਹ ਪੈਰੋਲ ‘ਤੇ ਰਹੇਗਾ। ਸਾਰੇ ਅਪਰਾਧੀਆਂ ਨੂੰ ਇਹ ਪੈਰੋਲ ਮਿਲਦੀ ਹੈ।
