Breaking News- ਪੰਜਾਬ ਪੁਲਿਸ ਨੇ ਫ਼ਿਲਮੀ ਸਟਾਈਲ ‘ਚ ਦੋ ਕਾਰ ਸਵਾਰ ਨਸ਼ਾ ਤਸਕਰਾਂ ਨੂੰ ਕੀਤਾ ਗ੍ਰਿਫ਼ਤਾਰ
ਚੰਡੀਗੜ੍ਹ, 9 ਅਗਸਤ – (ਪੰਜਬਾ ਡਾਇਰੀ) ਪੰਜਾਬ ਵਿਚ ਪੁਲਿਸ ਨੇ ਫਿਲਮੀ ਸਟਾਈਲ ਵਿਚ ਦੋ ਨਸ਼ਾ ਤਸਕਰਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਸੂਬੇ ਦੇ ਫਿਰੋਜ਼ਪੁਰ ਜ਼ਿਲ੍ਹੇ ‘ਚ ਪੁਲਿਸ ਨੇ ਸਭ ਤੋਂ ਪਹਿਲਾਂ ਤਸਕਰਾਂ ਦੀ ਗੱਡੀ ਨੂੰ ਪਿੱਛੇ ਤੋਂ ਟੱਕਰ ਮਾਰ ਦਿੱਤੀ। ਇਸ ਤੋਂ ਬਾਅਦ ਜਦੋਂ ਤਸਕਰ ਭੱਜਣ ਲੱਗੇ ਤਾਂ ਪੁਲਿਸ ਆਪਣੀ ਜੀਪ ‘ਚੋਂ ਬੰਦੂਕ ਲੈ ਕੇ ਬਾਹਰ ਆਈ ਅਤੇ ਭੱਜ ਕੇ ਤਸਕਰਾਂ ਨੂੰ ਫੜਨ ‘ਚ ਕਾਮਯਾਬ ਰਹੀ। ਇਹ ਸਾਰੀ ਘਟਨਾ ਕਿਸੇ ਫਿਲਮ ਤੋਂ ਘੱਟ ਨਹੀਂ ਲੱਗਦੀ ਸੀ। ਪੰਜਾਬ ਪੁਲਿਸ ਨੇ 10 ਕਿਲੋਮੀਟਰ ਪਿੱਛਾ ਕਰਕੇ ਤਸਕਰਾਂ ਨੂੰ ਫੜ ਲਿਆ। ਸਵਿਫਟ ਡਿਜ਼ਾਇਰ ਕਾਰ ਵਿਚ ਦੋ ਨਸ਼ਾ ਤਸਕਰ ਸਵਾਰ ਸਨ, ਜਿਨ੍ਹਾਂ ਕੋਲੋਂ 10 ਗ੍ਰਾਮ ਹੈਰੋਇਨ ਬਰਾਮਦ ਹੋਈ ਹੈ। ਪੁਲੀਸ ਵੱਲੋਂ ਤਸਕਰਾਂ ਨੂੰ ਫੜਨ ਦਾ ਸਾਰਾ ਦ੍ਰਿਸ਼ ਬਾਜ਼ਾਰ ਵਿਚ ਲੱਗੇ ਸੀ. ਸੀ. ਟੀ. ਵੀ. ਕੈਮਰੇ ਵਿਚ ਕੈਦ ਹੋ ਗਿਆ।
ਸਿਟੀ ਪੁਲਸ ਸਟੇਸ਼ਨ ਦੀ ਟੀਮ ਨੇ ਫਿਰੋਜ਼ਪੁਰ ਦੇ ਮੇਨ ਬਾਜ਼ਾਰ ਦੇ ਬੰਸੀ ਗੇਟ ਇਲਾਕੇ ‘ਚ ਇਕ ਸਵਿਫਟ ਡਿਜ਼ਾਇਰ ਕਾਰ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ। ਪੁਲਸ ਨੂੰ ਦੇਖ ਕੇ ਕਾਰ ਸਵਾਰਾਂ ਨੇ ਰਫਤਾਰ ਵਧਾ ਦਿੱਤੀ ਅਤੇ ਵਿਚਕਾਰਲੇ ਬਾਜ਼ਾਰ ਤੋਂ ਭੱਜਣ ਲੱਗੇ। ਥਾਣਾ ਸਿਟੀ ਦੇ ਐਸ. ਐਚ. ਓ. ਮੋਹਿਤ ਧਵਨ ਵੀ ਸਰਕਾਰੀ ਗੱਡੀ ਨੂੰ ਪਿੱਛੇ ਲੈ ਗਏ।
