MBBS ਦਾਖ਼ਲਿਆਂ ਦੀ ਦੌੜ ਵਿਚ 411 ਸੀਟਾਂ ਰਹੀਆਂ ਖਾਲੀ, ਪੰਜਵੇਂ ਰਾਊਂਡ ’ਚ ਵੀ ਨਹੀਂ ਮਿਲੇ ਵਿਦਿਆਰਥੀ
ਪਿਛਲੇ ਸਾਲ ਨਾਲੋਂ ਛੇ ਗੁਣਾ ਵਧਿਆ ਖਾਲੀ ਸੀਟਾਂ ਦਾ ਅੰਕੜਾ, ਪ੍ਰਾਈਵੇਟ ਕਾਲਜਾਂ ਦੀਆਂ ਮਹਿੰਗੀਆਂ ਫ਼ੀਸਾਂ ਨੇ ਮੈਡੀਕਲ ਸਿੱਖਿਆ ਦੀ ਪਹੁੰਚ ’ਤੇ ਖੜ੍ਹੇ ਕੀਤੇ ਸਵਾਲ
ਨਵੀਂ ਦਿੱਲੀ : ਦੇਸ਼ ਵਿੱਚ ਮੈਡੀਕਲ ਦੀ ਪੜ੍ਹਾਈ ਕਰਨ ਲਈ ਵਿਦਿਆਰਥੀਆਂ ਦੀ ਵੱਡੀ ਗਿਣਤੀ ਦਾਖ਼ਲੇ ਦੀ ਉਡੀਕ ਕਰ ਰਹੀ ਹੈ, ਪਰ ਕੌਂਸਲਿੰਗ ਦੇ ਪੰਜ ਗੇੜ ਪੂਰੇ ਹੋਣ ਦੇ ਬਾਵਜੂਦ ਐੱਮਬੀਬੀਐੱਸ ਦੀਆਂ 411 ਸੀਟਾਂ ਖਾਲੀ ਰਹਿ ਗਈਆਂ ਹਨ। ਪਿਛਲੇ ਸਾਲ ਦੇ ਮੁਕਾਬਲੇ ਇਸ ਵਾਰ ਖਾਲੀ ਸੀਟਾਂ ਦੀ ਗਿਣਤੀ ਲਗਭਗ ਛੇ ਗੁਣਾ ਵਧਣ ਨਾਲ ਮੈਡੀਕਲ ਸਿੱਖਿਆ ਦੀ ਮਹਿੰਗਾਈ ਅਤੇ ਇਸ ਨੂੰ ਆਮ ਵਿਦਿਆਰਥੀਆਂ ਦੀ ਪਹੁੰਚ ਵਿੱਚ ਲਿਆਉਣ ਬਾਰੇ ਚਰਚਾ ਛਿੜ ਗਈ ਹੈ।
ਮੈਡੀਕਲ ਕੌਂਸਲਿੰਗ ਕਮੇਟੀ (ਐੱਮਸੀਸੀ) ਦੇ ਸੂਤਰਾਂ ਮੁਤਾਬਕ ਸਪੈਸ਼ਲ ਸਟਰੇ ਵੇਕੈਂਸੀ ਰਾਊਂਡ ਲਈ ਜਾਰੀ ਸੀਟ ਮੈਟ੍ਰਿਕਸ ਵਿੱਚ ਐੱਮਬੀਬੀਐੱਸ ਦੀਆਂ 948 ਖਾਲੀ ਸੀਟਾਂ ਸ਼ਾਮਲ ਸਨ। ਇਨ੍ਹਾਂ ਵਿੱਚੋਂ 537 ਸੀਟਾਂ ਉਮੀਦਵਾਰਾਂ ਨੂੰ ਅਲਾਟ ਕੀਤੀਆਂ ਗਈਆਂ, ਜਦਕਿ ਕੌਂਸਲਿੰਗ ਮੁਕੰਮਲ ਹੋਣ ਤੋਂ ਬਾਅਦ ਵੀ 411 ਸੀਟਾਂ ਭਰਨ ਤੋਂ ਰਹਿ ਗਈਆਂ।
ਸੂਤਰਾਂ ਅਨੁਸਾਰ ਪਿਛਲੇ ਸਾਲ ਕੌਂਸਲਿੰਗ ਤੋਂ ਬਾਅਦ 60 ਤੋਂ 70 ਐੱਮਬੀਬੀਐੱਸ ਸੀਟਾਂ ਹੀ ਖਾਲੀ ਰਹੀਆਂ ਸਨ। ਇਸ ਵਾਰ ਇਹ ਗਿਣਤੀ ਲਗਭਗ ਛੇ ਗੁਣਾ ਵਧ ਗਈ ਹੈ। ਸੀਟਾਂ ਖਾਲੀ ਰਹਿਣ ਦੇ ਪਿੱਛੇ ਪ੍ਰਾਈਵੇਟ ਮੈਡੀਕਲ ਕਾਲਜਾਂ ਦੀਆਂ ਭਾਰੀ ਫ਼ੀਸਾਂ ਨੂੰ ਇੱਕ ਸੰਭਾਵੀ ਕਾਰਨ ਮੰਨਿਆ ਜਾ ਰਿਹਾ ਹੈ। ਇਨ੍ਹਾਂ ਕਾਲਜਾਂ ਵਿੱਚ ਮੈਡੀਕਲ ਦੀ ਪੜ੍ਹਾਈ ਲਈ ਲੱਖਾਂ ਰੁਪਏ ਖ਼ਰਚਣੇ ਪੈਂਦੇ ਹਨ, ਜਿਸ ਕਾਰਨ ਕਈ ਉਮੀਦਵਾਰ ਦਾਖ਼ਲਾ ਲੈਣ ਤੋਂ ਪਿੱਛੇ ਹਟ ਸਕਦੇ ਹਨ। ਹਾਲਾਂਕਿ, ਸੀਟਾਂ ਖਾਲੀ ਰਹਿਣ ਦੇ ਅਸਲ ਕਾਰਨਾਂ ਬਾਰੇ ਅਧਿਕਾਰਤ ਤੌਰ ’ਤੇ ਕੋਈ ਸਪੱਸ਼ਟ ਜਾਣਕਾਰੀ ਨਹੀਂ ਦਿੱਤੀ ਗਈ।
ਅੰਡਰਗ੍ਰੈਜੂਏਟ ਮੈਡੀਕਲ ਦਾਖ਼ਲਿਆਂ ਦੇ ਪਹਿਲੇ ਗੇੜਾਂ ਤੋਂ ਬਾਅਦ ਖਾਲੀ ਰਹਿ ਗਈਆਂ ਸੀਟਾਂ ਭਰਨ ਲਈ ਐੱਮਸੀਸੀ ਵੱਲੋਂ ਸਪੈਸ਼ਲ ਸਟਰੇ ਵੇਕੈਂਸੀ ਰਾਊਂਡ ਕਰਵਾਇਆ ਗਿਆ ਸੀ। ਸੁਪਰੀਮ ਕੋਰਟ ਨੇ ਕਮੇਟੀ ਨੂੰ ਕੌਂਸਲਿੰਗ ਦੇ ਚਾਰ ਗੇੜ ਕਰਵਾਉਣ ਦੇ ਨਿਰਦੇਸ਼ ਦਿੱਤੇ ਸਨ। ਇਸ ਤੋਂ ਬਾਅਦ ਖਾਲੀ ਸੀਟਾਂ ਭਰਨ ਲਈ ਪੰਜਵਾਂ ਗੇੜ ਵੀ ਕਰਵਾਇਆ ਗਿਆ, ਪਰ ਇਸ ਦੇ ਬਾਵਜੂਦ 411 ਸੀਟਾਂ ਖਾਲੀ ਰਹਿ ਗਈਆਂ।
ਇਸ ਅੰਕੜੇ ਨੇ ਦੇਸ਼ ਵਿੱਚ ਮੈਡੀਕਲ ਸਿੱਖਿਆ ਦੀ ਕਿਫ਼ਾਇਤ ਨੂੰ ਲੈ ਕੇ ਨਵੀਂ ਚਰਚਾ ਛੇੜ ਦਿੱਤੀ ਹੈ। ਜਿੱਥੇ ਇੱਕ ਪਾਸੇ ਵਿਦਿਆਰਥੀ ਮੈਡੀਕਲ ਦਾਖ਼ਲੇ ਲਈ ਸਖ਼ਤ ਮਿਹਨਤ ਕਰ ਰਹੇ ਹਨ, ਉੱਥੇ ਦੂਜੇ ਪਾਸੇ ਸੀਟਾਂ ਖਾਲੀ ਰਹਿਣਾ ਮਹਿੰਗੀ ਪੜ੍ਹਾਈ ਨੂੰ ਇੱਕ ਵੱਡੀ ਰੁਕਾਵਟ ਵਜੋਂ ਸਾਹਮਣੇ ਲਿਆ ਰਿਹਾ ਹੈ।
-(ਪੰਜਾਬੀ ਜਾਗਰਣ)
ਨੋਟ– ਤਾਜ਼ੀਆਂ ਖ਼ਬਰਾਂ ਪੰਜਾਬੀ ਵਿੱਚ ਸਭ ਤੋਂ ਪਹਿਲਾਂ ਪੰਜਾਬ ਡਾਇਰੀ ‘ਤੇ ਪੜ੍ਹੋ। ਸਭ ਤੋਂ ਭਰੋਸੇਮੰਦ ਵੈੱਬਸਾਈਟ ਬਾਲੀਵੁੱਡ, ਜੀਵਨਸ਼ੈਲੀ ਅਤੇ ਖੇਡਾਂ ਨਾਲ ਸਬੰਧਤ ਖਬਰਾਂ ਇਸ ਲਿੰਕ https://punjabdiary.com/ ‘ਤੇ ਜਾ ਕੇ ਪੜ੍ਹੋ।
